Jezus Christus

Van Wikipedie

11e eeuws pertret van Jezus

Volges de christelijke leer is Jezus Christus de eniggeboren Zeun van God, die deur God in 't Ouwe Testement (de joodse Tenach) de beleufde Messias en de Verlosser is die de minsen van d'r zunden zou redden en de harmonie tussen God en de mins zou herstellen. Hie beleufde minsen die in Hum geleuven te 'behouwen' en 'eeuwig leven' te geven. Zien - in 't Nieje Testament beschreven - geboorte (Kaarst), zien dood an 't kruus (Goeie Vriedag), zien opstanding uut de dood (Paosen), zien hemelvaort en Zien terugkomst staon centraol in de theologie van 't tredisionele christendom.

[bewark] Christelijke visie

Volges de uutleg die verschillende Biebelschrievers gaffen, en die Jezus zelf oek gaf, maakte Jezus' dood de hereniging mit God de Vaoder meugelijk, deurdat de Zeun de straf op hum nam veur de zunden van de minsen (zoas dujelijk veurspeld was in de joodse Tenach, namelijk Jesaja 53). De opvatting dat Jezus mit zien kruusdood de mins herenigt mit God heet de verzoeningsleer. Daordeur trad 't Abrahamitische principe van de 'rechtvaordiging deur geleuf' op een nieje menier in waarking: iedereen die in Jezus zou geleuven, zou veur God de Vaoder erechtvaordigd wezen. De opstanding, die deur vele minsen slechts symbolisch op-evat wordt, wordt echter deur de meeste geleuvigen binnen 't treditionele christendom letterlijk eneumen. De gebeurtenis neemt daor een belangrieke plek in, umdat 't veur hulie de uuteindelijke overwinning over de dood as 'leste vieaand' tot uutdrukking ebrocht het. 't Is daormee een iezig belangriek symbool van de hoop op 'niej leven', 'leven naor de dood' en 'eeuwigheid bie God'.

Volges christenen is Jezus de Messias van God die in de boeken van de prefeten veurspeld was. Eén van de vele veurbeelden van een oudtestamentische Messiaanse prefetie is 't boek van de prefeet Jesaja, heufdstuk 53, vanof veers 3.

[bewark] Naam

De naam Jezus is een vernederlansing van 't Latiense Iesus dat weer een verlatiensing is van het Griekse Ιησους (uutspraok: Jèsoes). Dit is op zien beurt weer een vergrieksing van 't Hebreeuwse Jesjoea (יהושוע), een laotere vorm van Jehosjoea, waorvan de drekte vernederlansing Jozua is. Dit is oek de naam van een oudtestamentisch Biebelboek, dat in de Griekse vertaoling Septuaginta inderdaod Ιησους heet.

[bewark] Jezus' uterlijk

De baargrede

Niemand weet precies hoe Jezus der uut-ezien het. Op de meeste schilderiejen van Jezus, staot hie of-ebeeld as een man mit lang haor en een lichte huudskleur. Volges wetenschappers is dit niet zoas Jezus der uut-ezien zou hen, 't haor wordde deur de mannen in Jezus' tied namelijk niet lang edreugen, dit wordde ezien as ontoepasselijk veur een man. Jezus had dus werschienlijk wat korter en donkerder haor. Oek de lichte huudskleur is volges wetenschappers niet de huudskleur die Jezus ehad zou hen, 't was namelijk typisch veur minsen uut Galilea um een wat etinte huudskleur te hen. Umdat minsen greig een beeld van Jezus wouen hen, hen minsen in de loop van de tied verschillende schilderiejen emaakt, mit partie schilderiejen die wat populairder waren, dit het uuteindelijk eleid tot 't beeld wat minsen vandaag de dag van Jezus hen.

[bewark] De taol van Jezus

Jezus praotte werschienlijk Aramees en Hebreeuws (en in elk geval oek een bietjen Grieks vanwegen zien waarkzaamheden as timmerman vlakbie de Sepforis). Dit is oek terug te vienen in de Biebel. 't Ouwe Testement is namelijk eschreven in 't Hebreeuws en 't Aramees. 't Nieje Testement is eschreven in 't Grieks mit enkele Aramese invleujen. Veur een veurbeeld van 't veersjen 'Onze Vaor die in de hemel is' zie 't artikel Onzevaor.

[bewark] Trivia

Jezus is zoas 't Biebelverhaol vertelt geboren in een kribbe. Een kribbe is eigenlijks gewoon een zeuning (of een etesbak veur de dieren). In 't Urkers het de betekenis van 't woord kribbe veraanderd in een soeja (oek wel wieg eneumd).

[bewark] Nedersaksisch

De naam Jezus Christus wordt in sommige dialecten oek wel eschreven as Jezus Kristus. Partie luui spreken 't woord Christus echter oek wel uut as Gristus.